वनकर्मीद्वारा चलाएको गोली लागेर चियाश्रमिकको मृत्यु भएको आरोप लगाउँदै स्थानीय मानिसहरूद्वारा विरोध प्रदर्शन

सुकना : सुकना फरेस्टबाट चर्न गएको गाईलाई ल्याउन गएको समय वनकर्मीले गोली चलाउँदा 28 वर्षीय अजित शौर्यको मृत्यु भएको आरोप लगाउँदै स्थानीय मानिसहरूले आज सुकना फरेस्ट रेन्ज अफिस अघि विरोध प्रदर्शन गरे। घटनाको खबर पाएर प्रधाननगर थानाका आईसी,  वेस्ट जोन एसीपी चिन्मय मित्तल लगायत खरसाङका एडिशनल एसपी घटनास्थलमा पुगे। उक्त प्रदर्शनकारीहरूले जबसम्म आरोपी वनकर्मीलाई सजाय दिँदैन तबसम्म आफूहरूको आन्दोलन जारी रहने बताए। मृतकको शव उद्धार गरेर पोस्टमार्टमको लागि मेडिकल कलेज एवम् अस्पतालमा पठाएको छ। मोहर गाउँका स्थानीय मानिसहरूको आरोप अनुसार हिजो साँझ अजित शौर्य सुकना फरेस्टमा चर्न गएको गाई लिन गएको समय वनकर्मीहरूले तिनीमाथि गोली चलाउँदा तिनको मृत्यु भएको बताइएको छ।