दार्जिलिङ (निसं): भारतीय गोर्खा प्रजातान्त्रिक मोर्चाका उम्मेद्वारहरूले चुनाउ आचार संहिताको उल्लघंन गरेको हाम्रो पार्टीले आरोप लगाएको छ। पञ्चायत चुनाउ प्रचारको अन्तिम समय हिज विहिबारको साँझमा समाप्त भए तापनि भागोप्रमो-का उम्मेद्वार सरस्वती गुरूङ, धुब्र प्रधान, सञ्जय प्रधान, एचके थापा, सरजु छेत्री, हेम थापा, गोपाल प्रधान आदिले आज शुक्रबार लिङगिया चिया बगानको साइला धुरामा चुनाउ प्रचार गरेको हाम्रो पार्टीको आरोप रहेको छ।
यसको साथै तिनीहरूले मतदाताहरूलाई प्रलोभन देखाउँदै प्लास्टिकहरू वितरण गर्ने काम गरेको पनि आरोप लगाइएको छ। चुनाउ प्रचारको समय समाप्त भएर पनि यसरी चुनाव प्रचार गर्नु आचार संहिताको उल्लघंन हो भन्दै यसबारे सम्बन्धित विभागीय अधिकारीलाई उचित कार्यवाही गर्ने मांग गर्दै हाम्रो पार्टीले ज्ञापन सुम्पिएको जारी विज्ञप्तिमा बताइएको छ।