भागोप्रमो खरसाङ महकुमा समितिको सभा सम्पन्न

खरसाङ (निसं): भागोप्रमो खरसाङ महकुमा समितिको आयोजनामा आगमी 7 जनवरीमा सम्पन्न हुने सभा विषयमा राखिएको सभा खरसाङ पार्टी कार्यालयमा महकुमा समिति सभापति सुवास प्रधानको सभापतित्वमा सम्पन्न भयो। सभामा केन्द्रीय समिति महकुमा समिति समष्टि प्रतिनिधि अनि सभासदहरुलाई लिएर आयोजन गरिएको सभालाई सोनादा पचेङ समष्टिको कार्यकारी सभासद अनोज थापा, केन्द्रीय समिति सदस्य तथा टुङ्ग सन्तमेरिज समष्टि सभासद नुरी शेर्पा, केन्द्रीय समिति सदस्य तथा तीनधारे महानदी समष्टिको सभासद नवराज छेत्री, युवा शक्ति सभापति पेबेन्द्र गुरूङ, हिल तराई डुवर्स प्लान्टेनसन वर्कर्स युनियन महकुमा समिति सभापति सागर गुरूङ, खरसाङ खण्डा समिति सभापति अनु छेत्री, केन्द्रीय समिति नारी शक्ति सदस्या जैतुन निशा खातुन, केन्द्रीय समिति सदस्य समुम बम्जन लगायत अन्यले सभामा आ-आफ्नो विचार अनि सुझावहरू राखे। सभामा हाल केन्द्रीय समिति सदस्यमा मनोनित सदस्यहरु नुरी शेर्पा, नवराज छेत्री अनि सुमन बम्जनलाई महकुमा समितिको तर्फबाट खादा लगाएर बधाई टक्राइयो। आजको सभालाई महकुमा समिति महासचिव प्रणाम रसाइलीले सञ्चालन गरेका थिए। सभापछि पत्रकारहरूसित कुराकानी गर्दै सभासद प्रणाम रसाईलीले सभा विषयमा बताएका छन्।