भाजपा विधायक शङ्कर घोषको नाममा सिलगढी थानामा अभियोग दर्ता

सिलगढी : सिलगढीको भारतनगर तरूण तीर्थ क्लब अघि टीकाकरण केन्द्र बाहिर भाजपाका विधायक शङ्कर घोषलाई प्रताड़ित गरेको तृणमूल विरुद्ध अभियोग उठेको छ। घटनालाई लिएर विधायकले सिलगढी थानामा अभियोग दर्ता गरेका थिए। यसपछि विधायकको नाममा एउटी महिलाले थानामा उल्टै अभियोग दर्ता गरिन्। सिलगढीको 24 नम्बर वार्ड निवासी एउटी महिलाले गत बुधबार विधायक शङ्कर घोषले बाहिरका मानिसहरूलाई ल्याएर टीकाकरण केन्द्रमा हमला गरेको साथै तिनलाई धक्का दिँदा चोट समेत लागेको आरोप लगाउँदै थानामा अभियोग दर्ता गरिन्। शङ्कर घोषले उक्त आरोपहरू सुनेर आफू अवाक रहेको बताउँदै टीकाकरण केन्द्रमा आफूलाई प्रताड़ित गरेको आरोप लगाए। उक्त इलाकाको केही घरहरूमा जडान गरिएको सीसीटीभी क्यामराको फुटेजको जाँच गरे वास्तविकता थाहा लाग्ने तिनले बताए। महिलाद्वारा आफूमाथि झुटो आरोप लगाएको तिनले दावी गरे।