भाजपा-द्वारा सिलगढीमा ‘चेयरम्यान साहब देखुन’ कार्यक्रम शुरू गर्ने

सिलगढी :  सिलगढी सहरका मानिसहरूको समस्या नगरनिगम प्रशासकसमक्ष पुर्‍याउने उद्देश्य लिएर भाजपाले ‘चेयरम्यान साहब देखुन‘ अर्थात् चेयरम्यान साहेब हेर्नुहोस् कार्यक्रमको शुरुआत गर्ने भएको छ। महीनाको दुईवटा शुक्रबार यस कार्यक्रमको लाइभ हुनेछ। जनवरी महीनामा यसबारे एउटा वाट्सएप नम्बर पनि शुरू गरिने भएको छ। आज पत्रकार सम्मेलनको आयोजना गरेर सिलगढीका विधायक शंकर घोषले यसबारे जानकारी गराए। यस अवसरमा डाबग्राम–फुलबारीका विधायक शिखा च्याटर्जी लगायत भाजपाका अन्य केही नेताहरू उपस्थित थिए।  विधायक शंकर घोषले भने, ‘टक टु चेयरम्यान‘-लाई स्वागत गर्दछु। सिलगढी नगरनिगमलाई आफ्नो काम गर्नमा अझ सुविधा प्रदान गर्ने उद्देश्य लिएर भाजपाको तर्फबाट उक्त पहल गरिएको हो। सिलगढीका मानिसहरूले वाट्सएप-को माध्यमद्वारा आफ्नो समस्याहरूको एउटा भीडियो बनाएर ‘चेयरम्यान साहब देखुन‘–को माध्यमद्वारा आफूहरू समक्ष पठाएपछि आफूहरूले उक्त भीडियो नगरनिगमको प्रशासक मण्डलीका चेयरम्यान गौतम देवसमक्ष पुर्‍याउने तिनले बताए। पहिलो फेजमा महीनाको दुई दिन उक्त कार्यक्रम चल्ने तिनले बताए।