खरसाङ (निसं) : भारतीय गोर्खा प्रजातान्त्रिक मोर्चाको स्थापना दिवस आज सर्वप्रथम एउटा ऱ्यालीको साथमा खरसाङमा केन्द्रीय स्तरमा पालन भइरहेको छ। उक्त ऱ्याली खरसाङको टुरिस्ट लजदेखि शुरु भएर हिलकार्ट रोड हुँदै खरसाङ बजार परिक्रमा गरेर मोटर स्ट्याण्ड हुँदै मन्टिभियट खेल मैदानमा पुगेर भव्य स्थापना दिवस कार्यक्रममा परिणत भएको थियो। उक्त ऱ्यालीमा भारतीय गोर्खा प्रजातान्त्रिक मोर्चाको केन्द्रीय अध्यक्ष अनित थापा, केन्द्रीय महासचिव अमर लामा, केन्द्रीय उप सभापति एवम् कालेबुङका विधायक रुदेन सादा लेप्चा, केन्द्रीय नेतृत्वहरू लगायत विभिन्न समष्टिका पार्टी कार्यकर्ताहरू सामेल थिए। पार्टी कार्यकर्ताहरूद्वारा नाँच-गानको साथमा गरिएको ऱ्याली मन्टिभियट खेल मैदानको मञ्चमा पुगेर समाप्त भएको थियो।
पार्टीको स्थापना दिवसको अवसरमा पार्टीको अध्यक्ष अनित थापा आफै पनि केही झण खुशीसाथ आफ्ना समर्थकहरूसित नाँचेको देखियो। भारतीय गोर्खा प्रजातान्त्रिक मोर्चाको स्थापना दिवस भएकोले कार्यक्रमको शुरुवात पार्टीको झण्डा उत्तोलन गरेर अनि धुप दीप प्रज्वलन गरी थालिएको थियो। यस अवसरमा भारतीय गोर्खा प्रजातान्त्रिक मोर्चाको केन्द्रीय अध्यक्ष अनित थापाले आफ्नो पार्टीको कार्यकर्ताहरूलाई सम्बोधन गर्दै एक वर्ष अघि मात्रै खोलिएको पार्टीको आज स्थापना दिवस हो र धेरै छिट्टो समय बितेर गएको बताए। तिनले आज हामी सबैको लागि खुशीको दिन हो साथै रमाउने र खुशी हुने दिन हो भनी बताए।