खरसाङ (निस): जीटीए अध्यक्ष अनित थापाले भर्खरैको कलकत्ता भ्रमण गरेर आए लगत्तै पहाड़मा विकास कार्यहरूको निम्ति राज्य विभागीय अधिकारीहरूको भ्रमण गर्ने क्रम शुरू भएको छ। यसै क्रममा आज खरसाङमा डम्पिङ ग्राउण्ड साइडको पुनर्निर्माण तथा सड़क निर्माण लगायत विकासको निरीक्षण गर्ने विभागीय अधिकारीहरू भ्रमणमा आए। भ्रमण अधिकारीहरूमा विशेषगरी अमिताभ दास, उप निर्देशक (सुधा), सुतीर्थ चटर्जी, पूर्व इन्जिनियर (सुधा),अरुण प्रामानिक, कार्यकारी इन्जिनियर, नीलमणि माझी, एई, सीताराम साह, जुनियर इन्जिनियर,सिलगढ़ीका सबै एमईडी, ब्रिगेन गुरुङ, अध्यक्ष खरसाङ नगरपालिका, सुवास प्रधान, उपाध्यक्ष खरसाङ नगरपालिका, जीपी अधिकारी एसएई, एडविन छेत्री, अख्तियार, रमेश सुब्बा, एसआई, खरसाङ नगरपालिका, दिव्येन्दु भट्टाचार्य, सोनम लामा, अनुषा तामाङ, (प्रतिनिधिहरू) हिजली प्रेरणा अनि प्रेम तामाङ आदि उपस्थित थिए।
यसबारे अवगत गराउँदै सुवास प्रधानले जीटीए मुख्य कार्यपाल अनित थापालाई खरसाङको डम्पिङ ग्राउण्ड निर्माण लगायत यहाँको मैला कुचैला व्यवस्थापन सड़क निर्माणका कार्य सम्बन्धी अवगत गराउँदै यसको विकास र पुन: निर्माण गर्नको निम्ति लिखित आवेदन गरेकै फलस्वरुप कलकत्तामा सम्बन्धित विभागीय अधिकारीहरूलाई जानकारी गराएपछि आज विभागीय अधिकारी अनि अभियन्ताहरू भ्रमणको निम्ति आएको अवगत गराउँदै अब चाँड़ै यहाँ विकासका कार्यहरू धमाधम हुने आशा व्यक्त गरे। यसको साथै तिनले जीटीए मुख्य कार्यपाल, राज्य सरकार अनि सम्बन्धित विभागीय अधिकारीहरू आभार प्रकट गरे।