विविध मागमा दार्जिलिङ जिल्ला कङ्ग्रेस कमिटीद्वारा जिल्लाशासकलाई ज्ञापन

सिलगढी : 6 सूत्री मागलाई लिएर आज दार्जिलिङ जिल्ला कङ्ग्रेस कमिटीले  जिल्लाशासक एस पन्नमबलमसित भेट गरेर एउटा ज्ञापन पत्र चढाए। कोरोना परिस्थितिमा सिलगढी तथा दार्जिलिङ जिल्लामा चिकित्सा क्षेत्रमा साधारण मानिसहरूले धेरै समस्याको सामना गर्न परिरहेको छ। यसैले कङ्ग्रेस नेता शंकर मालाकारले आज विविध मागलाई लिएर जिल्लाशासकसित भेट गरेर एउटा ज्ञापन पत्र चढाएको बताइएक छ। निजी अस्पतालहरूमा उपचारको नाममा मानिसहरूबाट धेरै रुपियाँ लिइने गरेको आरोप लगाउँदै तिनले यी निजी अस्पतालहरूमाथि नजर राख्नको लागि एउटा विशेष पर्यवेक्षण कमिटी गठन गरिनुपर्ने अपील गरेका छन्। यसबाहेक, सरकारी र निजी अस्पतालहरूमा कोरोना संक्रमितहरूको लागि बेडको संख्या वृद्धि गरियोस्, अस्पतालहरूमा पर्याप्त टीकाकरण र अक्सिजनको व्यवस्था गरियोस् आदि जस्ता मागहरू उक्त ज्ञापन पत्रमा उल्लेख गरिएको छ। यसको साथै जिल्लाशासकले यी सबै मामिलालाई गम्भीरतापूर्व लिइने शङ्कर मालाकारले अपील गरेका छन्।