बिहेबाट फर्किरहेको समय सडक दुर्घटनामा 5 जनाको मृत्यु

इटाहार :  उत्तर दिनाजपुर जिल्लाको इटाहारको 34 नम्बर राष्ट्रिय राजमार्गमा मर्मान्ति सडक दुर्घटनामा 5 जनाको मृत्यु भएको छ, जसमा दुईजना साना नानी सामेल छन्। उक्त घटनापछि इलाकामा शोकको लहर छाएको छ। मृतकहरू क्रमैले स्वपन दास, पिङ्की दास, ईशान दास, अनिर्वान बसाक र पञ्चमी दास  सामेल छन्। प्राप्त जानकारीअनुसार गत अबेर राति बिहेबाट टोटो एवम् बाइकमा सवार भएर घर फर्किरहेको समय इटाहार पम्पमोड इलाकाको 34 नम्बर राष्ट्रिय राजमार्गमा एउटा मालवाहक लरीसित आपस्तमा ठोक्किँदा घटनास्थलमै 5 जनाको मृत्यु भएको बताइएको छ। उक्त घटनापछि लरी चालक र खलासीले घटनास्थलबाट सुइँकुच्चा ठोके। घटनाको खबर पाएर इटाहार थाना पुलिस घटनास्थलमा पुगेर 5 जनाको शव उद्धार गरेर पोस्टमार्टमको लागि पठाउनको साथै घटनाको जाँच शुरू गरेको छ।