मङपु : गोजमुमो अध्यक्ष बिमल गुरुङ आज अपरान्ह 2 बजीको समय मङपु परिभ्रमणमा आइपुगे। यस अवसरमा तिनलाई मङपुको सिरेल मन्दिर र नालीडाँडामा तिनका पार्टीका समर्थकहरूले भव्य रूपमा स्वागत जनाए। यसपछि मङपु विभाग सार्वजनिक भवनमा सम्पन्न पार्टीको कार्यक्रममा पुगेर मोर्चा अध्यक्ष बिमल गुरुङले महात्मा गाँधीको तस्विरमा दीप प्रज्ज्वलन गरेर कार्यक्रमको शुरूआत गरे। लिलाबहादुर छेत्री र स्वरुप गुरुङले सञ्चालन गरेको सभा गोजमुमो समष्टिका अध्यक्ष शरण राईको अध्यक्षतामा सम्पन्न भयो।
समष्टि सचिव बुद्धकुमार थापाले स्वागत सम्भाषण राखेपछि सभामा रतन लामाले सिन्कोना उद्योग विषयमा आफ्नो मन्तव्य राखे। यसैगरी, पार्टीका शीर्ष नेता अन्मोल थापा अनि दिपेन मालेले पनि सभालाई सम्बोधन गरे। आजको सभामा विभिन्न पार्टी छोडेर 150 भन्दा अधिक समर्थकहरूले गोजमुमोलाई समर्थन जनाए। तिनीहरूलाई पार्टी अध्यक्ष बिमल गुरुङले स्वागत जनाउँदै पार्टीको झन्डा प्रदान गरे। पार्टी सूत्रले दिएको जानकारी अनुसार मोर्चा अध्यक्ष बिमल गुरुङले आज मङपुको बीचकमानमा नै एक रात बिताएर भोलि दार्जिलिङ फर्किने कार्यक्रम रहेको छ।