बिमल गुरूङले 2021-को विधानसभा चुनाउमा तृणमूललाई सघाउने घोषणा

कोलकाता : दार्जिलिङ पहाडको राजनीतिमा लगभग 3 वर्षपछि फेरि नयाँ स्थिति आजदेखि देखापरेको छ। गोजमुमोको भूमिगत अध्यक्ष बिमल गुरूङले आउँदो 2021-को विधानसभा चुनाउमा भाजपालाई होइन तर तृणमूल कांग्रेसलाई सहयोग गर्ने घोषणा गरेका छन्। गत 3 वर्ष अघिदेखि भूमिगत अज्ञात अवस्थामा रहेका बिमल गुरूङ आज अचानक कोलकातामा देखापरे। यसको साथै यहाँ तिनले पत्रकारहरूलाई सम्बोधन गर्दै भाजपासितको पुरानो सम्बन्धलाई तोडेर अब आउँदो 2021-को बंगाल विधानसभा चुनाउमा तृणमूल कांग्रेसलाई सहयोग गर्ने घोषणा गरेपछि यता दार्जिलिङ पहाडमा यसलाई लिएर चर्चा चुलिएको छ। गत 2009 देखि नै भाजपा सांसदलाई जिताएर पठाए तापनि गोर्खाहरूको दीर्घकालीन अलग राज्यको माग तथा 11 जातिलाई जनजातिको मर्यादा दिने विषय लगायत 3 वर्षदेखि गोर्खाल्याण्ड आन्दोलनपछि भूमिगत अवस्थामा रहेका हजारौँ मानिसहरूको निम्ति भाजपाको सरकारले केही नगरेकोले गर्दा नै भाजपाप्रतिको विश्वास हटेर गएको तिनले बताए। यसको साथै एनडीए-को घटक दलबाट आफ्नो दल गोजमुमो अलग भएको कुरा पनि तिनले पत्रकारहरूलाई जानकारी गराए।