सिलगढी : विमान मार्फत् गाँजा तस्करी गर्न अगावै 20 किलो गाँजा सहित एकजना तस्करलाई पक्राउ गरेपछि आज सिलगढी अदालतमा पेश गरियो। पक्रा परेका व्यक्ति अनन्त ग्रोबरको रूपमा चिन्हित गरिएको छ। प्राप्त जानकारी अनुसार गत राति अनन्त ग्रोबर कुचबिहारबाट बसमा सवार भएर बाघडुग्रा विमानअड्डामा आइपुगेपछि त्यहाँबाट दिल्ली जाने तिनको उद्देश्य रहेको थियो। तथापि, विमानअड्डामा चेकिङ अवधि सीआईएसएप-को टोलीले तिनको ब्यागबाट गाँजा उद्धार गरेपछि विमानअड्डाका कर्तृपक्षले यसबारे पुलिसलाई खबर दिए।
घटनाको खबर पाएर बाघडुग्रा थाना पुलिस घटनास्थलमा पुगेर गाँजा सहित उक्त व्यक्तिलाई पक्राउ गरेर थानामा लगेको बताइएको छ। पुलिस सूत्रले दिएको जानकारी अनुसार उक्त गाँजा दिल्लीमा तस्करी गर्ने उद्देश्यले लगिरहेको थियो। पक्रा परेका व्यक्तिबाट 20 किलो गाँजा उद्धार गरेको छ, जसको अनुमानित बजार मूल्य लगभग लाखौँ रुपियाँ रहेको छ। घटनाको जाँच शुरू गरेको पुलिस सूत्रले जनाएको छ।