चोरी गरेको चियापत्ती सहित 4 जना पक्राउ

सिलगढी : एनजेपी थाना पुलिसले चोरी गरेको चियापत्ती सहित 4 जनालाई पक्राउ गरेपछि आज जलपाईगढी अदालतमा पेश गर्यो। पक्रा परेकाहरूमा बिट्टु राय, सईदुल इस्लाम, कमलेश छेत्री र लतिकुल इस्लाम सामेल छन्। प्राप्त जानकारी अनुसार गत 8 सेप्टेम्बरको दिन जटियाकालीको एउटा चियापत्ती कारखानाबाट लगभग 34 कुइन्टल चियापत्ती चोरी भएको थियो। यसपछि कारखाना कर्तृपक्षले एनजेपी थानामा लिखित अभियोग दर्ता गरेपछि पुलिसले जाँच शुरू गरेको थियो। अन्ततः पुलिसले चोरी गरेको आरोपमा 4 जना व्यक्तिलाई पक्राउ गरेपछि चोरी गरेको 5 कुइन्टल चियापत्ती उद्धार गरेको छ। यसको साथै एउटा पिकअप भ्यान पनि जफत गरेको छ। पुलिस सूत्रले दिएको जानकारी अनुसार गत राति चोरी गरेको चियापत्ती मदारीहाट लैजाने उद्देश्यले ती 4 जना व्यक्ति जटियाकाली इलाकामा उभिरहेको समय पुलिसले पक्राउ गरेको बताइएको छ। पुलिसले चोरी गरेको 29 कुइन्टल चियापत्तीको खोजी शुरू गरेको छ।