नयाँ दिल्ली : दार्जिलिङ क्षेत्रसँग सम्बन्धित महत्त्वपूर्ण मुद्दाहरूबारे मार्गदर्शनका लागि आज भाजपा-को राष्ट्रीय प्रवक्ता तथा दार्जिलिङका सांसद राजु विष्टले देशका गृहमन्त्री अमित शाहलाई नयाँ दिल्लीस्थित तिनकै कार्यालयमा भेट गरे। यसबारे तिनले जारी विज्ञप्तिमार्फत उक्त जानकारी गराएका छन्। तिनले जारी गरेको विज्ञप्तिमा उल्लेख गरे अनुसार, उहाँको दूरदर्शी नेतृत्व सबै नागरिकहरू निम्ति विश्वास अनि आशाको निरन्तर स्रोत रहिआएको छ। जति नै जटिल मुद्दाहरू भएता पनि राष्ट्रीय हितमा ठोस निर्णय लिने उहाँको साहस अनि दृढ़ताका लागि उहाँको व्यापक सम्मान र सह्रनी गरिन्छ। उहाँको नेतृत्वले हाम्रो राष्ट्रका जनतालाई अति कठिन समयमा पनि सकारात्मक अनि विश्वासले भरिपूर्ण रहन शक्ति र प्रोत्साहन प्रदान गर्दछ।
हाम्रो क्षेत्रका जनताको उहाँमाथि दृढ़ आस्था छ र उहाँको अद्वितीय नेतृत्वमा नै हामीले अन्ततः न्याय पाउने छौँ भन्ने अगाध विश्वास छ। हाम्रो क्षेत्रको बारेमा उहाँको गहिरो समझदारी अनि हाम्रा जनताको कल्याणप्रति उहाँको वास्तविक चिन्ताबाट म धेरै उत्साहित भएको छु। मलाई पूर्ण विश्वास छ कि उहाँको सक्षम मार्गदर्शनमा हाम्रो प्यारो क्षेत्र र जनताको उज्ज्वल अनि सुनौलो भविष्य सुनिश्चित छ।