दार्जिलिङ, कालेबुङ र सिलगढीको सरकारी अस्पतालमा पीएसए प्लान्ट्स-को व्यवस्था गरिदिनुपर्ने सांसद विष्टले गरे प्रधानमन्त्रीलाई माग

सिलगढी : कोभिड 19-को दोस्रो लहरले देशभरिमै कोरोना संक्रमितहरूको सङ्ख्या बढ्दै गइरहेकोले दार्जिलिङ जिल्लाका सबै जनालाई सतर्क बनेर, मास्क लगाएर, सामाजिक दूरीको नियमहरू पालन गरिदिने साथै सरकारद्वारा निर्देशित नियमहरूलाई पालन गरिदिने दार्जिलिङका सांसद राजु विष्टले सबैसित अनुरोध गरेका छन्। तिनले दार्जिलिङ, कालेबुङ र सिलगढीको सरकारी अस्पतालमा पनि पीएसए प्लान्ट्स (Pressure Swing Adsorption Plants) स्थापित गर्नको लागि देशका प्रधानमन्त्री नरेन्द्र मोदीलाई अनुरोध गरेको बताएका छन्। तिनले आज एउटा विज्ञप्ति जारी गरेर बताएअनुसार केन्द्र सरकारले देशभरि स्वास्थ्य सम्बन्धि सुविधाहरू अनि पूर्वाधार अझ दह्रिलो पार्ने दिशामा कार्य गरिरहेको दावी गरेका छन्। पहिलो चरणको कोरोना संक्रमण काल अवधि देशमा मूलभूत रूपमा आवश्यक वस्तुहरू जस्तै पीपीई किट्स, एन95 मास्क, सेनिटाइजर लगायत भेन्टिलेटरहरू पाउन निक्कै गाह्रो थियो। तर अहिले देशमा 7 हजार करोड़ रुपियाँको उद्योगको साथ विश्वमा नै पीपीई किट्सको दोस्रो सबैभन्दा ठुलो उत्पादक बन्न सफल भएको तिनले बताएका छन्। देश स्वतन्त्र भएदेखि 2020 सम्मको अवधिमा देशमा लगभग 30 हजार भेन्टिलेटर मात्र थियो भने गत 12 महिनाको अवधिमा नै केन्द्र सरकारले भारतमा नै निर्मित थप 36 हजार भेन्टिलेटर आपूर्ति गरेको तिनले जानकारी दिएका छन्। यसको साथै कोभिड संक्रमण शुरू हुन अघि देशमा एन95 मास्क बनाउने मात्र तीनवटा कम्पनी थियो भने अहिले देशमा 3 हजारभन्दा अधिक कम्पनीहरू रहेकोले गर्दा घरेलु उत्पादन क्षमता 8 लाख प्रतिदिन पुगिसकेको बताइएको छ। यसैगरी, टीकाकरणको हिसाबले, भारत 14.5 करोड़ देशवासीहरूको तीव्र गतिमा टीकाकरण गर्ने विश्वमा नै पहिलो देश बनेको छ। अब आगामी 1 मईदेखि 18 वर्षदेखि अधिक उमेर पुगेका सबै भारतीयहरूलाई टीकाकरण कार्य शुरू भएपछि यो दर अझ बढ़ेर जाने तिनले बताएका छन्। टीकाकरणको लागि पञ्जीकरण गर्न सहयोग पुर्‍याउन विशेष गरेर युवा पिँढीहरूलाई अघि आइदिने सांसद राजु विष्टले अपील गरेका छन्।