दार्जिलिङ लगायत पहाडका विभिन्न ठाउँमा गोरामुमो-को पोस्टरिङ

दार्जिलिङ : गोर्खा राष्ट्रिय मुक्ति मोर्चा केन्द्रिय अध्यक्ष मन घिसिङको निर्देशमा पहाड़को चारैतिर पोस्टर टाल्ने कार्य शुरू गरेको छ। हिजो 14 सेप्टेम्बरदेखि संसदको मनसुन सत्र शुरू भएकोले यस सत्रमा नै पहाड़को स्थायी राजनैतिक समाधानको पनि कुरा उठेको हुनुपर्छ भन्ने सन्देश सरकार समक्ष पुराउने उद्देश्यले पोस्टर टाल्ने कार्य गरिएको बताइएको छ।  यसै क्रममा आज दार्जिलिङ सहर लगायत पहाडका विभिन्न ठाउँहरूमा गोरामुमो-ले व्यापक पोस्टरिङ गरेको छ। यसैगरी, आज सोनादा बजारमा पनि गोर्खा राष्ट्रिय युवा एकाईको तत्वावधानमा ब्यापक रुपमा पोस्टर टाल्ने कार्य गरियो। पोस्टरमा गोर्खाहरूको राजनैतिक समस्याको स्थायी समाधान गर्न झट्टै ठोस कदम उठाउनु पर्ने माग लगायत गत 5 अगस्त 2020 मा डाकेएको जीटीएको समीक्षा सभा स्थगित होइन पूर्णरूपमा रद्द हुनपर्ने तथा पहाड़, तराई, डुर्वसलाई तीनतिरबाट अन्तर्राष्ट्रिय सीमानाले घेरेको हुनाले कुनै पनि समय यी क्षेत्रहरूमा राष्ट्रविरोधी तत्वहरू सक्रिय हुन सक्छ यसैले राष्ट्रिय सुरक्षा हितलाई ध्यानमा राखेर पहाड़,तराई र डुर्वसको राजनैतिक समस्याको समाधान यथाशीघ्र गर्नु पर्ने अनि स्थायी राजनैतिक समाधानको पक्षधरले असंवैधानिक जीटीएबाट आफ्नो हस्ताक्षर एकतर्फी फिर्ता लिनुपर्ने जस्ता मागहरू पोस्टरमा लेखिएको छ।