दार्जिलिङ नगरपालिका चुनाउबारे हिल टीएमसी नेतृत्वगण तथा बोर्डका चेयरम्यानहरूसित गौतम देवले गरे बैठक

दार्जिलिङ : राज्यको विभिन्न ठाउँहरूमा हुने 108 वटा नगरपालिका सहित दार्जिलिङ नगरपालिकाको 27 फरवरीको दिन हुने चुनाउको निम्ति आज सिलगढी नगरनिगमका पार्षद् तथा भावी मेयर गौतम देवले दार्जिलिङ गएर त्यहाँका विभिन्न बोर्डका अध्यक्ष अनि हिल तृणमूल कङ्ग्रेसका शीर्ष नेतृत्वहरूसित बैठक गरे। उक्त बैठकमा विभिन्न जात गोष्ठीको विकास बोर्डका चेयरम्यानहरू लगायत हिल टीएमसीका दार्जिलिङ अनि कालेबुङ जिल्ला अध्यक्ष तथा सांसद शान्ता छेत्री, हिल टीएमसी चेयरम्यान एलबी राई, पार्टी प्रवक्ता एनबी खवास, विनय तामाङ, गौतम देव आदि उपस्थित थिए। बैठकपछि पत्रकारहरूसितको कुराकानी गौतम देवले बताएअनुसार आजको बैठक आउँदो दार्जिलिङ नगरपालिका चुनाउको रणनीतिलाई लिएर गरिएको थियो भने बैठकमा विभिन्न 16 वटा बोर्डका चेयरम्यानहरूमध्ये 12 वटा बोर्डका चेयरम्यान तथा हिल तृणमूलका शीर्ष नेतृत्वहरू उपस्थित थिए। बैठक अवधि उपस्थित बोर्डका चेयरम्यानहरूले दार्जिलिङ नगरपालिका चुनाउमा तृणमूल पार्टीको तर्फबाट खडा भएका मोठ 10 जना उम्मेद्वारहरूलाई समर्थन जनाउने भएको तिनले बताए। यसबाहेक आजको बैठकमा कतिपय कारणवश उपस्थित हुन नसकेका 4 जना बोर्डका चेयरम्यानहरूसित फोनमार्फत् यसबारे कुराकानी गर्ने गौतम देवले बताए। दार्जिलिङ नगरपालिकाको मोठ 32 वटा आसनमध्ये तृणमूल कङ्ग्रेसले 10 वटा वार्डमा आफ्नो पार्टीको उम्मेद्वार दिएको जानकारी गराउँदै चुनाउ जितेपछि बङ्गालकै सबैभन्दा दोस्रो पुरानो दार्जिलिङ नगरपालिकालाई नगरनिगमको दर्जा दिलाउने लगायत दार्जिलिङको चौतर्फी विकास गरेर लैजानेबारे पहल गरिने तिनले बताए।