दार्जिलिङ पहाडमा डेमोक्रेसी छैन, टीएमसीकै ईसारामा दार्जिलिङ नगरपालिकाको बोर्ड दखल गरेको हो : सांसद राजु विष्ट

सिलगढी: दार्जिलिङ पहाडमा डेमोक्रेसी नरहेको साथै राज्य सरकारले यहाँ धेरै वर्षदेखि पञ्चायत चुनाउ नगरेर मनपरी गरिरहेको छ अनि एक मात्र दार्जिलिङ नगरपालिकाको निर्वाचित बोर्डलाई समेत टीएमसीकै ईसारामा दखल गरेको दार्जिलिङका सांसद राजु विष्टले आरोप लगाए। टीएमसीले आगामी 2024 को चुनाउभन्दा अघि पहाडलाई अस्थिर र अशान्त पारेर चुनाउमा फाइदा लुट्ने प्रयास गरिरहेको तर यसमा तिनीहरू सफल नहुने आज बाघडुग्रा विमान अड्डामा पत्रकारहरूसामु तिनले दावी गरे। दार्जीलिङका सांसद राजु विष्ट आज संसदको शीतकालीन अधिवेशन सकेपछि बागडुग्रा हवाई अड्डा हुँदै आफ्नो संसदीय क्षेत्रमा आइपुगेका छन्। बाघडुग्रा हवाई अड्डामा आइपुगेपछि तिनले उपस्थित पत्रकारहरूले सोधेको विभिन्न प्रश्नहरूको उत्तर पनि दिए। तिनले अझ भने, भोलीको दिन दार्जिलिङ, सिलगढी साथै सम्पूर्ण उत्तर बंगालको निम्ति पुन: एकपल्ट ऐतिहासिक क्षण हुनेछ। भारत सरकारको प्रधानमन्त्री मोदीको तर्फबाट उत्तर बंगालका जनतालाई नयाँ वर्ष अगावै उपहार मिल्नेछ। भोली शुक्रबार हाउडादेखि एनजेपीसम्म चल्ने बन्दे भारत ट्रेनको शुरूवात् हुनेछ, जसको उद्घाटन स्वयम् प्रधानमन्त्री नरेन्द्र मोदीले गर्नेछन्। उत्तर बंगाल क्षेत्रलाई भारत सरकारले प्राथमिकता दिएर विविध विकासमूलक कार्यहरू केन्द्रीय योजना मार्फत भइरहेको छ भनी सांसद राजु विष्टले बताए। यसको साथै उत्तर बंगालको समस्त जनसाधारणको तर्फबाट सांसद राजु विष्टले देशका प्रधानमन्त्री नरेन्द्र मोदीप्रति आभार प्रकट गरेका छन् । आगामी अप्रेल महिनामा जी-20को अधिवेशन सिलगढी अनि दार्जिलिङमा हुने जानकारी दिँदै सबैभन्दा शक्तिशाली देशका राजदूत साथै अन्य प्रतिनिधिहरूले दार्जिलिङ पहाड़ भ्रमण गर्नेछन्, जसको फलस्वरुप पहाड़ पर्यटकको निम्ति अझ अघि बढ्ने प्रबल सम्भावना साथै असल अवसर हुने पनि सांसद विष्टले बताए। हाल कोविद संक्रमण पुन: बढिरहेको कारण सबैलाई सतर्क रहने पनि तिनले आव्हान गरे।