दार्जिलिङ शहरको जाम कम गर्न लेबोङ स्टेडियमदेखि 3 माइलसम्म नयाँ बाटोको निर्माण गरिने

दार्जिलिङ (निसं): दार्जिलिङ शहरको ट्राफिक जामलाई केही राहत दिनको लागि लेबोङ स्टेडियमदेखि पाण्डाम हुँदै 3 माइलसम्म (कालेबुङ रोड) नयाँ बाटोको निर्माण हुने भएको छ। यस बाटोको दूरी 13.5 किलो मिटर रहनेछ। यस बाटो निर्माणको लागत करिब 11 करोड रहनेछ। यो पहल जीटीएले गर्ने भएको छ। सभासद् नोर्देन शेर्पाले आज बिहान जीटीए पर्यटन विभागको तत्वावधानमा तेन्जिङ्ग नोर्गे शेर्पाको सम्झनामा आयोजित तेन्जिङ नोर्गे ट्रेकिङ ट्रायल कार्यक्रममा घोषणा गरेका छन्।
यसलाई लिएर जीटीए प्रमुख कार्यपाल अनित थापाले भने,“हामी कर्ममा विश्वास गर्ने राजनैतिक दल हौं। हाम्रो सोच माथि विश्वास राखेर नै जनताले हामीलाई पहाडको रेखदेख गर्न सत्तामा राखेका छन्। दार्जिलिङ शहरको ट्राफिक समस्या ठूलो समस्या हो। यो समस्या पूर्ण रूपले समाधान गर्नु नसके पनि अब निर्माण हुने 13.5 कि मी दूरीको नयाँ बाटोले केही हदसम्म निवारण गर्नेछ। हाम्रो पहाड सुन्दर छ। पर्यटकहरू हाम्रो सुन्दरतामा नै मोहित भएर वर्षै पछि आउँछन्। ट्राफिकको समस्याले पर्यटकलाई पनि राहत दिनेछ। तेन्जिङ नोर्गे ट्रेकिङ ट्रायलले पर्यटनलाई अर्कै स्तरमा पुर्याउनेछ भन्ने मेरो विश्वास छ।”