फुलबारीको 14 वर्षीय नाबालिका निखोज, परिवार चिन्तामा

राजगञ्ज  : फुलबारीको 14 वर्षीय नाबालिका गत 20 दिनदेखि निखोज छन्। प्राप्त जानकारीअनुसार राजगञ्ज ब्लकको फुलबारी इलाकामा केही परिवार तम्बू टाँगेर बसोबास गर्दै आइरहेका छन् भने ती परिवारहरूले भिख मागेर आफ्नो परिवारको भरण पोषण गर्दै आइरहेका छन्। गत 1 दिसम्बरको दिन ती परिवारहरूमध्ये एउटा परिवारको 14 वर्षीय नाबालिका निखोज भएकी छन्। परिवारका सदस्यहरूले उक्त नाबालिकाको यताउता खोजी गरे तापनि कुनै पत्तो नलागेपछि एनजेपी थानामा नाबालिका निखोज भएको बारे अभियोग दर्ता गरे। नाबालिकाको आमाले बताएअनुसार फुलबारीको एउटा खुल्ला मैदानमा तम्बू टाँगेर तिनीहरू बसोबासो गर्दै आइरहेका छन्। छोरीलाई घरमा एक्लै छोडेर काममा गएका थिए भने साँझ कामबाट घर फर्किआउँदा छोरी घरमा थिएनन्। यसपछि लगातार केही दिनसम्म नाबालिकाको खोजबीन गर्दा पनि कुनै पत्तो नलागेपछि अन्तमा 5 दिसम्बरको दिन नाबालिका निखोज भएकोबारे एनजेपी थानामा अभियोग दर्ता गरेको तिनले बताइन्। हालसम्म उक्त निखोज नाबालिकाको कुनै पत्तो नलागेपछि तिनका परिवारका सदस्यहरू चिन्तित बन्न पुगेका छन्।