घरबाट सुनको बहुमूल्य गर-गहना चोरी गरेको आरोपमा नौकरानी पक्राउ

सिलगढी (निसं) : भक्तिनगर थाना अन्तर्गत बंकिम नगर इलाकास्थित एउटा घरमा चोरी गरेको आरोपमा पुलिसले नौकरानीलाई पक्राउ गरेपछि आज जलपाईगढी अदालतमा पेश गर्यो। पक्रा परेका नौकरानीको नाम बेला बारा (23) बताइएको छ। तिनी कालचिनी निवासी हुन्।  प्राप्त जानकारी अनुसार भक्तिनगर थाना अन्तर्गत बंकिम नगर इलाका निवासी भीम विश्वकर्माको घरमा गत केही समय अघिदेखि कालचिनी निवासी बेला बाराले नौकरानीको रूपमा काम गर्दै आइरहेकी थिइन्। बेलाले उक्त घरबाट लाखौँ रुपियाँको सुनको बहुमूल्य गर-गहना चोरी गरेर चम्पट कसेको आरोप रहेको छ। भीम विश्वकर्माले गत राति घटनाबारे भक्तिनगर थानामा लिखित अभियोग दर्ता गरेपछि अभियोगको आधारमा जाँचमा जुटेका पुलिसले केही घण्टाको अवधिमै मेटली थानाको सहयोगमा नौकरानी बेला बारालाई तिनको आफन्तको घरबाट पक्राउ गरेको बताइएको छ। यसको साथै पुलिसले चोरी गरेको सुनको बहुमूल्य गर-गहना पनि उद्धार गरेको छ। घटनाको जाँच शुरू गरेको पुलिस सूत्रले जनाएको छ।