सिलगढी : हडतालको समर्थनमा वामफ्रन्ट र कांग्रेसले सिलगढी सहरमा र्याली निकाल्यो। आगमी 8 जनवरीको दिन 12 वटा श्रमिक संगठनले संयुक्त रूपमा देशव्यापी हडताल डाकेको छ। उक्त हड़ताललाई सफल तुल्याउनको लागि श्रमिक संगठनले संयुक्त रूपमा लगातार कार्यसूची ग्रहण गरिरहेको छ। यसै क्रममा वामफ्रन्ट र कांग्रेस पार्टीको श्रमिक संगठनहरूले पनि हडताललाई समर्थन गर्दै उक्त दिनको बन्दलाई सफल तुल्याइदिने सबैसँग आहवान गर्दै सडकमा ओर्लिएको छ। आज सिलगढी सहरमा वामफ्रन्ट अनि कांग्रेस पार्टीको श्रमिक संगठनले एकैसाथ बन्दको समर्थनमा एउटा र्याली निकाले। सिलगढीको बाघाजतीन पार्कबाट शुरू गरेको र्यालीले सहरको परिक्रमा गर्दै यहाँको एयरभ्यु मोडमा पुगेर समापन गरियो भने र्यालीमा वामफ्रन्ट नेता अशोक भट्टाचार्य, जीवेश सरकार र कांग्रेस दार्जिलिङ जिल्ला अध्यक्ष शङ्कर मालाकारलगायत दुवै पार्टीका सदस्यहरू सामेल थिए।