हात्तीको हमलामा युवकको मृत्यु, इलाकावासीद्वारा सडक अवरोध गरेर विरोध प्रदर्शन

राजगञ्ज : हात्तीको हमलामा एकजना युवकको मृत्यु भएको छ। उक्त घटना आज बिहान जलपाईगढी जिल्लाको बारोपाटिया ग्राम पञ्चायत अन्तर्गत टिस्टा तट इलाकामा घटेको हो। मृतक युवक सदर ब्लक अन्तर्गत बारोपाटिया अञ्चलको नाथुआ तट इलाका निवासी 25 वर्षीय सागर दासको रूपमा चिन्हित गरिएको छ। स्थानीय सूत्रले दिएको जानकारी अनुसार आज बिहान दुई भाइ गाईलाई खेत लगेपछि त्यहाँबाट बदाम खेतमा गएका थिए। एउटा हात्ती पहिलादेखि नै त्यहीँ रहेको तिनीहरूले थाहा पाएनन्। अचानक हात्तीले तिनीहरूमाथि हमला गर्दा साना भाइ त्यहाँ भाग्न सफल भए तापनि ठुलो दाजु सागर दास हात्तीको हमलाको सिकार भए। सागरलाई तत्कालै उद्धार गरेर जलपाईगढी सुपर स्पेशियालिटी अस्पतालमा लगे तापनि त्यहाँका चिकित्सकहरूले तिनलाई मृत घोषित गरिदिए। युवकको मृत्युले इलाकामा शोकको लहर छाएको छ। घटनापछि आक्रोशित मानिसहरूले बोदागञ्ज मिलनपल्ली पक्का सडक जाम गर्नको साथै सडकमा आगो जलाएर विरोध प्रदर्शन गरे। स्थानीय मानिसहरूको आरोप अनुसार सयौँको संख्यामा हात्तीहरूको झुण्डले धेरै महिना अघिदेखि इलाकामा ताण्डव मच्चाउनको साथै इलाकाको फसलहरू पनि नष्ट गरिदिएको छ। उक्त हात्तीको झुण्डलाई जङ्गलतिर लखेट्नको लागि वन विभागले कुनै पहल नगरेको तिनीहरूले आरोप लगाए।