सिलगढी : बङ्ग्ला तथा अङ्ग्रेजी भाषामा बीएड परीक्षा लेख्न पाए तापनि हिन्दी भाषामा यसको अवसर थिएन। यसैले धेरैजना विद्यार्थीहरू बीएड गर्न अन्य राज्यमा जान बाध्य थिए। तथापि, अब बीएडका विद्यार्थीहरूले हिन्दी भाषामा पनि परीक्षा दिन पाउनेछन्। आज सिलगढीमा पत्रकार सम्मेलनको आयोजना गरेर पश्चिमबंग हिन्दी एकाडेमीका चेयरम्यान विवेक गुप्ताले यसबारे जानकारी गराए। तिनले भने, हाल राज्य सरकार हिन्दी भाषालाई समान रूपमा मान्यता दिन कटिबद्ध छ। राज्यका अन्य भाषासित समान रूपमा तालमेल राख्न पश्चिमबंग हिन्दी एकाडेमी गठन गरिएको छ। पश्चिम बंगाल सरकारले राज्यमा केही हिन्दी विद्यालय खोल्ने विचार गरिरहेको छ। अर्कोतिर, बीएड परीक्षामा हिन्दी भाषामा पनि प्रश्न पत्र शुरू गर्ने मुख्यमन्त्रीले घोषणा गरेकी छन्। सत्र 2021-22 –को अवधिमा नै उक्त प्रक्रिया शुरू हुने बताइएको छ।