जलपाईगढीमा जमिन विवादमा 6 जना घाइते

जलपाईगढी : जमिन विवादलाई लिएर झगडा हुँदा 6 जना घाइते भएका छन् भने तीमध्ये 5 जनाको अवस्था आशंकाजनक रहेको छ। उक्त घटना गादाङ 2 नम्बर ग्राम पञ्चायतको झाड सालबारी इलाकामा घटेको हो। घाइतेहरूलाई जलपाईगढीको सुपर स्पेसिलिटी अस्पतालमा भर्ना गरिएको छ। प्राप्त जानकारीअनुसार दीर्घदिनदेखि नीलकमल मण्डल र सुशील मण्डलमाझ जमिनलाई लिएर विवाद चलिरहेको थियो। सुशील मण्डलका छोरा तापस मण्डलले बताएअनुसार आज बिहान तिनी खेतमा जाँदा नीलकमल अनि तिनका छोरा लट्ठी र कोदालो लिएर त्यहाँ आएका थिए। यसपछि नीलकमलले काकीलाई टाउकोमा प्रहार गर्नको साथै भाईलाई पनि प्रहार गरेर घाइते बनाएको तिनले बताए। अर्कोतिर, नीलकमल मण्डलकी स्वास्नी मालती मण्डलले बताएअनुसार जोर जबरजस्ती गरेर तिनीहरूले आफूहरूको जमिन दखल गर्ने प्रयास गरेको साथै जमिनमा लगाएको पाटको खेती पनि गोरू लगाएर नष्ट गरिदिएपछि लोग्ने नीलकमलले यसबारे तिनीहरूसित जान्न चाहँदा उल्टै कुटपीट गरेको तिनले आरोप लगाइन्। उक्त विषयबारे थानामा अभियोग दर्ता गरेको तिनले बताइन्।