जलपाईगढीमा व्यक्तिको शव उद्धार

जलपाईगढी : जलपाईगढीको 21 नम्बर वार्डस्थित कलेजपाड़ामा आज एकजना व्यक्तिको शव उद्धार भएको छ। मृतक अटल सिंहको रूपमा चिन्हित गरिएको छ। स्थानीय सूत्रअनुसार अटल सिंह जलपाईगढीको कलेजपाड़ामा आफ्नो घरमा एक्लै बस्दै आइरहेका थिए। तिनको स्वास्नी र छोरी कामको सिलसिलामा अन्य ठाउँमा बस्दै आइरहेको बताइएको छ। अटल सिंह क्यान्सर रोगले पीड़ित थिए। स्थानीय मानिसहरूले हिजो रातिदेखि नै तिनलाई नदेखेको साथै आज बिहान घरको सबै दैलो र झ्याल बन्द देखेपछि तिनको आफन्तहरूलाई यसबारे खबर दिए।  तिनको आफन्तहरू आएर घरको झ्याल भत्काएर भित्र पस्दा ओछ्यानमा खुनमा लतपत अवस्थामा तिनको शव उद्धार गरेको बताइएको छ। यसपछि घटनाबारे जलपाईगढी कोतवाली थाना पुलिससलाई खबर दिएपछि पुलिस घटनास्थलमा पुगेर शव उद्धार गरेर पोस्टमार्टमको लागि जलपाईगढी सदर अस्पतालमा पठाएको छ। पोस्टमार्टमको रिपोर्ट आएपछि मात्र तिनको मृत्युको कारण पत्तो लाग्ने जलपाईगढी कोतवाली थानाका पुलिसले बताए। घटनाको जाँच शुरू गरेको पुलिस सूत्रले जनाएको छ।