अलिपुरद्वार : आगामी 18 फरवरीमा महाशिवरात्रि हो। शिवरात्रिको उपलक्ष्यमा प्रत्येक वर्ष जटेश्वरको गरूहाटी मैदानमा मेलाको आयोजना गर्ने गरिन्छ भने यस वर्ष पनि मेलाको आयोजना गरिने भएको छ। ऐतिहासिक उक्त मेलालाई केन्द्र गरेर युद्ध स्तरमा तयारी शुरू गरिएको छ। प्रत्येक वर्ष महाशिवरात्रिको अवसरमा विभिन्न इलाकाबाट धेरै संख्यामा श्रद्धालुहरू जटेश्वर शिव मन्दिरमा पुजा अर्चना गर्न आउने गर्दछन्। यस वर्ष पनि धेरै संख्यामा श्रद्धालुहरू जटेश्वर मन्दिरमा पुजा अर्चना गर्न आउनेछन् भन्ने कुरामा मन्दिर कमिटी आशावादी रहेको छ। यस विषयमा जटेश्वर शिव मन्दिर कमिटीका सचिव देवजीत पालले भने, आगामी 18 फरवरीदेखि शिव चतुर्दशी शुरू हुनेछ। शोभायात्राको माध्यमद्वारा नदीबाट जल ल्याएर महादेवलाई चढाइनेछ। महाशिवरात्रिदेखि शुरू गरेको ऐतिहासिक मेला 15 दिनसम्म चल्नेछ।