दार्जिलिङ : देशको विभिन्न ठाउँहरूमा हाल कोरोना भाइरसको आतङ्कबीच विशेष गरेर जीटीए, सिक्किम तथा उत्तर पूर्वीय क्षेत्रका भारतीय नेपालीहरूले विभिन्न सहरहरूमा जातीय भेदभावको सामना गर्न परेको घटनाहरू प्रकाशमा आइरहेको छ। भारतको दिल्ली, कलकत्ता आदि जस्ता ठाउँहरूमा केही भारतीय नेपाली भाषीहरूलाई “कोरोना” उपनाम दिनको साथै नस्ल भेद गर्दै अपमान गरिएको घटनालाई जीटीए चेयरम्यान अनित थापाले अति कडा शब्दमा निन्दा गरेका छन्। तिनले राज्यका मुख्यमन्त्रीलाई पत्राचार गरेर यस प्रकारको जातीय भेदभाव गर्ने व्यक्तिहरूलाई चिन्हित गरेर कठोर सजाय दिनुपर्ने माग गरेका छन्।
चेयरम्यान अनित थापाले बताएअनुसार यस्ता घटनाहरूलाई लिएर विभिन्न सोशल मीडियाहरूमा आफूले देख्नको साथै धेरै ठाउँहरूबाट आफूलाई फोन कल समेत आएको जानकारी गराएका छन्। विशेष गरेर जीटीए क्षेत्र लगायत सिक्किम अनि उत्तर पूर्वका भारतीय नेपालीहरूलाई तिनीहरूको शारीरिक बनावटको कारणले गर्दा नै देशका विभिन्न ठुल्ठुला सहरहरूमा गएर अध्ययन गर्ने विद्यार्थीहरू, कर्मचारीहरू तथा घुम्न जानेहरूलाई यस प्रकारको जातीय भेदभाव गरेर कोरोना भन्दै सम्बोधन गर्ने गरेकोले यस्ता घटनाहरूको तिनले निन्दा गरेका छन्।