खोरीबारी: खोरीबारी कांग्रेस पार्टीको तर्फबाट आज गणतन्त्र दिवसको उपलक्ष्यमा पार्टी कार्यालयमा एउटा कार्यक्रमको आयोजना गरिएको थियो। यस अवसरमा विधायक सुनील चन्द्र तिर्की, युवा एसेम्बली उपाध्यक्ष माणिक बर्मन, प्रखण्ड अध्यक्ष आलोक राय, अञ्चल अध्यक्ष मोहम्मद करीमसहित अन्य कार्यकर्ताहरू उपस्थित थिए। आज बिहान देशको 71 औ गणतन्त्र दिवस कार्यक्रमको अवसरमा प्रमुख अथितिका रूपमा उपस्थित स्थानीय विधायक सुनील चन्द्र तिर्कीले राष्ट्रीय झण्डा उत्तोलन गरेपछि खोरीबारी हस्पिटलमा गएर तिनीहरूले बिमारीहरूलाई फल एवम् मिठाई वितरण गरे।
यसवाहेक पार्टी कार्यालयमा कांग्रेसको तर्फबाट आवश्यकमन्द मानिसहरूलाई कम्बल पनि वितरण गरियो। अर्कोतिर, आजको यस कार्यक्रम अवधि स्थानीय विधायक सुनील चन्द्र तिर्कीको उपस्थितिमा गत केही महिना अघि पार्टी छोडेर गएका हेमन्त सिंह (गुरु दास ) र पिन्टु शर्मा आज फेरि कांग्रेस पार्टीमा सामेल भए। विधायक सुनील चन्द्र तिर्कीले आफ्नो पार्टीमा स्वागत जनाउँदै तिनीहरूलाई पार्टीको झण्डा प्रदान गरे।