खोरीबारीको एउटा घरमा लाखौँ रुपियाँको चोरी, जाँचमा जुट्यो पुलिस

खोरीबारी : खोरीबारीको महिपाल जोत इलाकाको एउटा घरमा लाखौँ रुपियाँको चोरी भएको छ। गत अबेर राति चोरले घरको आलमारी भत्काएर सुन-चाँदीको बहुमूल्य गर-गहना, नगद रुपियाँ सहित केही आवश्यक कागजपत्र चोरी गरेको बताइएको छ। प्राप्त जानकारी अनुसार गत राति पवित्र सिंहको परिवारका सदस्यहरू नयाँ वर्षको एउटा कार्यक्रममा गएका थिए भने राति घर फर्किआउँदा घरको दैलो खुल्ला रहेको देखे। घरभित्र पस्नसाथ आलमारी भत्केको अवस्थामा रहेको साथै आलबारीबाट 2 तोला सुनको र 10 तोला चाँदीको गर-गहना, 20 हजार रुपियाँ लगायत केही कागजपत्र चोरी गरेको थाहा पाए। आज घटनाको खबर पाएर खोरीबारी थाना पुलिस घटनास्थलमा पुगेर छानबीन गर्नको साथै घटनाको जाँच शुरू गरेको छ।