खोरीबारीमा 53औँ दुर्गा पुजाको खुट्टी पुजा सम्पन्न

खोरीबारी : खोरीबारी युवा सम्प्रदायको 53औँ दुर्गा पुजाको आज खुट्टी पुजा गरियो। सचिव रतन रायले बताएअनुसार गत 53 वर्षदेखि आफूहरूले प्रत्येक वर्ष आकर्षक तथा भव्य दुर्गा पुजाको आयोजना गर्दै आइरहेको छ। यस वर्ष दुर्गा पुजाको पण्डाल बुद्ध मन्दिरको स्वरूपमा सजाइने योजना रहे तापनि कोरोना महामारीले गर्दा सो रद्द गरेर कोरोना भाइरसबारे मानिसहरूलाई जागरूक गर्ने थीममा पुजा पण्डाल बनाइने तिनले बताए। स्वच्छता, सेनिटाइजर र माक्सको प्रयोगबारे उक्त पण्डालको माध्यमद्वारा मानिसहरूलाई जागरूक गराउने तिनले बताए। यसको साथै सरकारी नियमलाई पालन गर्दै दुर्गा पुजाको तयारी शुरू गरेको सचिव रतन रायले बताए। यस अवसरमा युवा सम्प्रदायका अध्यक्ष बादल चन्द्र सरकार, सचिव रतन राय, कोषाध्यक्ष देवब्रत सिन्हा, इन्द्रजीत सरकार, राजा दास लगायत अन्य उपस्थित थिए।