खरसाङ अम्बटे चिया बगानका नानीहरू र वृद्धाहरूलाई उपहार प्रदान

अम्बटे: खरसाङको ईभान फाउन्डेशन र कालेबुङको मणि ट्रस्टको संयुक्त पहलमा तथा अरेकल भोल्युन्टियरको सहयोगमा खरसाङको अम्बटे चिया बगानको श्रमिकहरूका 50 जना नानीहरू अनि 10 जना वृद्धालाई तिनीहरूको इच्छा अनुसार उपहार प्रदान गरियो। यसको साथै ती 50 जना विद्यार्थीहरूमाझ ‘चित्र बनाऊ’ प्रतियोगिताको पनि आयोजना गरियो। कार्यक्रममा प्रदान गरिएको उपहारहरु ब्ल्याङ्केट, स्कुल ब्याग, क्रिकेट र फुटबल किटहरु अनि अन्य सामग्रीहरू फ्लिपकार्ट र एमाजोन माफर्त आएको थियो। स्मरण रहोस, ईभान फाउन्डेशनले गत वर्ष पनि 60 जना विद्यार्थीहरुको लागि यस प्रकारको कार्यक्रम आयोजना गरेको थियो। ईभान फाउन्डेशनका अध्यक्ष प्रशान्त शर्माले यसबारे जानकारी दिँदै भने, यो कार्यक्रम अम्बटे चिया कमानमा गर्नुको मुख्य उद्देश्य नै चिया कमानका नानीहरूको मनोबल बढाउनु हो। यदि दार्जिलिङको भविष्य उज्वल हुनु हो भने कमानका नानीहरूलाई ध्यान दिनु आवश्यक छ।