खरसाङ : गोर्खा जनमुक्ति मोर्चा खरसाङ चिम्नी देउराली समष्टिको सांगठनिक सभा आज सम्पन्न भयो। समष्टि सभापति बीबी राईको अध्यक्षता सम्पन्न उक्त सभामा विशेष गरी गोजमुमो खरसाङ महकुमा समितिका अध्यक्ष समीरदीप ब्लोन, नारी मोर्चा केन्द्रीय समिति सचिव तथा अन्य प्रतिनिधिहरूको उपस्थिति रहेको थियो। सभामा 28 नम्बर खरसाङ चिम्नी देउराली समष्टिको नयाँ नारी मोर्चा गठन गरियो। यसै सभामा कोभिड 19-को समयमा आफ्नो ज्यान जोखिमा पारेर सेवा पुर्याइरहेका स्वास्थ्य कर्मचारीहरू, आशाकर्मीहरूलाई सम्मान जनाइयो। सभामा पार्टीको सांगठनिक गतिविधि र भावी योजनाहरू साथै क्रियाकलापहरू विषयमा वक्ताहरूले आ-आफ्नो वक्तव्य राखेका थिए।
सांगठनिक सभापछि पत्रकारहरूलाई सम्बोधन गर्दै खरसाङ नगर पार्षद एवम् 28 नम्बर खरसाङ चिम्नी देउराली समष्टिका सचिव श्याम शेर्पाले आज खरसाङ चिमनी देवराली समष्टिको सांगठनिक सभा सम्पन्न भएको बताए। तिनले पार्टीको मुद्दा अनुसार पर्जा पट्टाको लागि सभामा चर्चा गरिएको साथै चिमनी देवराली समष्टिका अधिकांश क्षेत्रमा पर्जा पट्टा पाउने सम्भावना बेसी रहेकोले यसलाई ध्यानमा राखेर आजको सभा गरिएको बताए। सचिव शेर्पाले समष्टिमा जस जसको पर्जा पट्टा छैन तिनीहरूलाई पट्टा दिलाउनमा सहयोग गर्ने साथै पार्टीबाट पनि आफूहरूलाई यसबारे पहल गर्नमा सहयोग गरिदिने भएकोले लागिपरेको बताए। पत्रकारहरूले सोधेका प्रश्नहरूको उत्तर दिँदै श्याम शेर्पाले आज यसै सभामा वर्तमान कोरोना भाइरसको महामारीबीच ग्राउण्ड जिरोमा खट्ने स्वास्थ्यकर्मीहरू र आशाकर्मीहरूलाई पनि सम्मान गरिएको बताएका छन् ।