खरसाङ (निसं) : खरसाङ देवराली समष्टिको तीन माईल बस्तीका ग्राम सुधार समिति अनि नव दिप संघ तीन माईलको पहलमा खरसाङ खण्ड अन्तर्गत चौधवटा ग्राम पञ्चायतहरूलाई लिएर अन्तर पञ्चायत विन्टर फुटबल टुर्नामेन्ट शुरु भएको छ। जीटीए मुख्य कार्यपाल अनित थापाको सहयोगमा सम्पन्न यस लातेभकुण्डो प्रतियोगितामा मोठ 42 वटा टिमहरूले भाग लिएका छन्। आज खेलको पहिलो दिनको समारोहमा मुख्य अथितिको रूपमा खरसाङ शहर चिम्नी देवराली समष्टिका सभासद श्याम शेर्पा उपस्थित थिए साथै विशिष्टि अथितिमा तीन माईल ग्राम सुधार समितिका सभापति जेबी छेत्री, 28 नम्बर समष्टि नारी शक्तिको अध्यक्षा सुष्मा मुखिया, चिम्नी देवराली ग्राम पञ्चायतको सचिव देवदत्त प्रधान, पञ्चायत क्षेत्रको विभिन्न समाजका पदाधिकारीगणको उपस्थितिमा खेलको शुभारम्भ गरियो।
आजको प्रथम खेल सन्तमेरिज बनाम दिलाराममाझ सम्पन्न भयो। यस खेलमा पेनल्टीमा सन्त मेरिजले विजय हासिल गर्यो। यस खेलबारे आयोजक समितिका पेम्बा तामाङले जानकारी गराउँदै यो खेलको आयोजना गर्नुको मुख्य उद्देश्य पञ्चायत क्षेत्रका खेलाडीहरूलाई प्रोत्साहन प्रदान गर्नु हो। खरसाङ खण्डबाट 42 वटा टिमहरूले भाग लिएका छन्। उक्त प्रतियोगितामा विजयी टोलीलाई आकर्षक ट्रफी सहित नगद राशि 70 हजार अनि उपविजेता टोलीलाई ट्रफी सहित 30 हजार रुपियाँ प्रदान गरिनेछ।