खरसाङ (निसं) : खरसाङको रोहिणीस्थित जगदम्बा मन्दिरमा तीन दिवसीय पुजाको आज समापन गर्नको साथै जगदम्बा मन्दिरको ऐतिहासिक पृष्ठभूमिमाथि लेखिएको पुस्तकको लोकार्पण पनि गरियो। कार्यक्रम अघि जगदम्बा मन्दिर रोहिणीमा धार्मिक रेलीको आयोजना गरिएको थियो। यस कार्यक्रममा प्रमुख अतिथिको रुपमा जीटीएको चिफ् एक्जीक्युटिभ अनित थापा उपस्थित थिए। यसै कार्यक्रममा रोहिणीको जगदम्बा मन्दिरको ऐतिहासिक पृष्ठभूमिमाथि शरद नेपालद्वारा लेखिएको पुस्तक ‘शिव पञ्चायन अनि देवी जगदम्बा मन्दिर ऐतिहासिक पृष्ठभूमि’ नामक पुस्तकको लोकार्पण पनि गरियो।
उक्त पुस्तकको लोकार्पण प्रमुख अतिथि जीटीए चिफ् अनित थापा, सभासदहरू कल्पना प्रधान,श्याम शेर्पा,नुरी शेर्पा,परेश तिर्की र लेखक शरद नेपाल आदिको बाहुलीबाट गरियो। आजको कार्यक्रम विषयमा पत्रकारहरूसित कुराकानी गर्दै आयोजक समितिको पक्षबाट साथै भागोप्रमो खरसाङ महकुमा समितिको सांगठनिक सचिव गजेन प्रधानले विस्तृत रुपमा बताएका छन् ।