खरसाङको श्री राम मन्दिरमा पनि भोलि पुजा अर्चना गरिने

खरसाङ (निसं): आगामी 22 जनवरीमा अयोध्यामा हुने श्री राम मन्दिरको प्राण प्रतिष्ठाको दिन देशभरि उत्सव सहित पुजा अर्चना गर्ने कार्यक्रम रहेको छ। यसै क्रममा यता खरसाङको श्री राम मन्दिरमा पनि प्राण प्रतिष्ठाको दिन पुजा अर्चना गरिने भएको छ। भोलि 22 जनवरीको दिन खरसाङको श्री राम मन्दिरमा पुजा कमिटीको आयोजनामा  मन्दिर परिसरमा बिहान 10 बजे गणेश पुजाको साथमा पुजा आरम्भ गरिने भएको छ। यसको साथै भोलि दिउँसो 3 घण्टासम्म हरि किर्तन गरिने र साँझमा मन्दिर परिसरमा दियो बालेर उत्सव मनाइने भएको छ। श्रीराम मन्दिरका पुरोहित अखिलेन्द्रनाथ द्विवेदीले उक्त दिन सबैलाई उपस्थित भएर शान्तिप्रिय ढङ्गमा उत्साहपूर्वक पुजा अर्चना गर्न आहवान गरेका छन्। यस अवसरमा सबैलाई मन्दिरमा आएर पुजा अर्चना गर्ने तिनले निवेदन गरेका छन्।