खरसाङ: पश्चिम बंगाल सरकारको ‘द्वारे सरकार‘ प्रकल्प अन्तर्गत दोस्रो चरणको प्रथम दिनको शिविर स्थानीय खरसाङ नगरपालिका अधिनस्थ रहेको मल्टी पर्पोर्स हलमा सम्पन्न भयो । भोलि दोस्रो क्याम्प राखिने भए तापनि सरकारद्वारा खरसाङ महकुमा क्षेत्रका विभिन्न चालकहरू र हकर्सहरूका लागि आगामी 18 दिसम्बरको दिन एउटा विशेष शिविरको आयोजना गरिने भएको छ। आज खरसाङमा पत्रकारहरूसित बोल्दै खरसाङ महकुमा अधिकारी आईएएस अभिषेक चौरासियाले 18 दिसम्बरको दिन चालकहरू र हकर्सहरूका लागि विशेष रुपमा ‘द्वारे सरकार‘ अन्तर्गत क्याम्प आयोजना गरिने बताएका छन्। तिनले द्वारे सरकार पश्चिम बंगाल सरकारको एक विशेष पहल अनुसार विभिन्न सरकारी प्रकल्पहरू जनताको घर दैलोमा पुऱ्याउने योजना हो र सरकारको विभिन्न योजनाहरू र प्रकल्पहरूलाई जनताले उपभोग गरोस् भनेर यो अभियान सरकारबाट आयोजना गरिएको बताए।