लावारिस ब्यागमा भेट्टाइयो हरिणको कस्तुरी, वनविभागद्वारा जाँच गरिने

सिलगढी : हरिणको कस्तुरीलाई केन्द्र गरेर सिलगढी नगरनिगमको 20 नम्बर वार्डमा सनसनी मच्चियो। आज सिलगढीको 20 नम्बर वार्डको संशोधानागर पछिल्तिरको सडकमा एउटा लावारिस ब्याग देखेपछि घटनाबारे इलाकाको काउन्सिलर अभया बोसलाई जानकारी गराइयो। तिनी घटनास्थलमा पुगेर उक्त ब्याग खोलेर हेर्दा हरिणको कस्तुरी भेट्टाइएपछि घटनाबारे बैकुण्ठपुर डिभिजनको डाबग्राम रेञ्जका वन कर्मीहरूलाई खबर दिए। घटनाको खबर पाएर वनकर्मीहरू घटनास्थलमा पुगेर हरिणको कस्तुरी उद्धार गरेर लगे। डाबग्राम रेञ्जका रेञ्जर श्यामा प्रसाद चाकलादारले बताएअनुसार उद्धार गरेको हरिणको कस्तुरी असली हो अथवा होइन भन्ने विषयमा जाँचको लागि जुलजिकल सर्वे अफ् इन्डियामा पठाइनेछ। उक्त घटनामा कोही संलग्न छ अथवा छैन भन्ने विषयमा वन विभागले जाँच गर्नेछ।