लकडाउनको उल्लङ्घन गर्नेहरू विरुद्ध पुलिसको नाका चेकिङ

सोनादा : कोरोना महामारीलाई रोक्नको लागि सरकारद्वारा जारी लकडाउन अवधि आज पुलिसले सोनादा बजार क्षेत्रमा लक डाउनको नियमलाई उल्लङ्घन गर्नेहरू विरूद्ध कठोर रूपमा नाका चेकिङ गरिरहेको छ। विशेष गरेर सोनादा पुलिसद्वारा बिना कारण बजार आउने वाहनहरूलाई चेकिङ गरिरहेको छ। सोनादा ट्राफीक इञ्चार्ज जनाधन यादवको नेतृत्वमा एएसआई मनोज तामाङ, एएसआई धनागोपाल लगायत सिभिक पुलिसको सहभागितामा वाहनहरूलाई रोकेर सोधखोज गर्ने कार्य भइरहेको छ। यस चेकिङ अवधि बिना कारण जताभावी ओहोर दोहोर गर्ने वाहनहरू साथै पास नभएको वाहनहरू विरूद्ध कानुनी कार्वाही गरिने कार्य जारी रहेको छ। तथापि सरकारी निर्देश अनुसार नै आपतकालीन सेवामा खटिएका वाहनहरूलाई लकडाउनबाट छुट दिएको पुलिसले जनाएको छ। त्यसरी नै बिनाकारण बजार आउने जनसाधारण जनतालाई पनि पुलिस प्रशासनद्वारा सोधखोज गर्दै बिना काम घरबाट बाहिर ननिस्किदिने अपिल गरिएको बताइएको छ।