मङ्पु गोल्ड कपः टाईब्रेकरमा हिमालयन स्पोर्टिङ क्लब सिक्किमलाई पराजित गरेर नर्थ बेङ्गल आर्म्ड पुलिसको रोमाञ्चक जीत

मङ्पु: मङ्पु युथ क्लबको आयोजनामा आजदेखि शुरू भएको मङ्पु गोल्ड कप फुटबल प्रतियोगिता 2021-अन्तर्गत रोमाञ्चक उद्घाटन म्याचमा हिमालयन स्पोर्टिङ क्लब सिक्किमलाई पराजित गरेर नर्थ बेङ्गल आर्म्ड पुलिसले जीत हासिल गऱ्यो। स्थानीय मङपु जनमैदानमा आज खेलिएको म्याचमा नर्थ बेङ्गल आर्म्ड पुलिसले हिमालयन स्पोर्टिङ क्लबलाई टाईब्रेकरमा 3-1 गोलले पराजित गऱ्यो। आजको म्याचमा हिमालयन स्पोर्टिङ सिक्किमको टीमको शुरुवात असल रह्यो, प्रद्युम लिम्बुले 23औं मिनटमा गोल गरेर टोलीलाई बढ़त दिलाए जुन मध्यान्तरसम्म कायम रह्यो। त्यसपछि दोस्रो हाफमा आर्म्ड पुलिसको टीमले बराबरी हासिल गऱ्यो। नर्थ बेङ्गल आर्म्ड पुलिसको तर्फबाट 44औं मिनटमा सुमितले गोल गरेर बराबरी स्कोर पुऱ्याए। त्यसपछि नियमित समयको खेलमा थप गोल हुन नसक्दा म्याच बराबरीमा सकिएपछि अन्तमा टाईब्रेकर गराइयो, जसमा 3-1 गोलले जीत हासिल गरी नर्थ बेङ्गल आर्म्ड पुलिस दोस्रो चरणमा प्रवेश गरेको छ। अब भोली आइतवार सिक्किमको सञ्जु फुटबल एकाडमी र सिलगढ़ीको ब्राइट स्पोर्टिङ्ग क्लबबीच भिड़न्त हुनेछ। टुर्नामेण्टका दुईवटा सेमिफाइनल क्रमशः 25 र 26 नोभेम्बरमा खेलिनेछ भने फाइनल 28 नोभेम्बरमा रहेको आयोजक समितिले जनाएको छ। पर्यावरण संरक्षणलाई ध्यानमा राखेर जीरो वेष्ट-को मूल मन्त्र लिएर टुर्नामेन्टको आयोजन गरिने आयोजक समितिका अध्यक्ष योगेश राई र सचिव रिषि सिंगदेनले बताए। टुर्नामेण्टमा विजेता हुने टीमलाई ट्रफीको साथमा 2 लाख र उपविजेता हुने टीमलाई ट्रफीको साथमा 1 लाख रुपियाँको नगद पुरस्कार प्रदान गरिने आयोजक समितिको पक्षमा विभोर सिंगदेनले जनाएका छन्।