मिरिक महकुमामा 1 अप्रेलदेखि दैलोमा सरकार शिविर हुने : महकुमा शासक सुदीप्त देवनाथ

मिरिक (निसं): मिरिक नगरपालिका अनि ग्राम पञ्चायत क्षेत्रमा दैलोमा सरकार शिविर कार्यक्रम आउँदो 1 देखि 10 अप्रेलसम्म हुने बारे मिरिक महकुमा शासक सुदीप्त देवनाथ अनि मिरिक खण्ड विकास अधिकारी श्रेयाश्री माइतीले जानकारी गराएका छन्। तिनीहरूले बताए अनुसार दैलोमा सरकार शिविर मिरिक नगरपालिकाको 9 वटा वार्ड अनि 6 वटा ग्राम पञ्चायतको 55 वटा वार्डमा हुनेछ। उक्त शिविरहरूको लाभ सबैलाई उठाइदिने अपिल गरेका छन्। जनताको सुविधाको लागि सरकारले दैलोमा सरकार कार्यक्रमको घोषणा गरेपछि यसपालीको शिविरमा पनि पहिलाको शिविरमा झै विभिन्न विभागको 36 वटा सरकारी योजनाहरूको लाभ मानिसहरूले उठाउन सक्ने जानकारी गराएका छन्। दैलोमा सरकार शिविरमा पहिला जस्तो लक्ष्मी भण्डार योजना, कन्याश्री, एकाश्री, रूपश्री, खाद्य साथी लगायत अन्य योजनाहरूको लाभ मानिसहरूले उठाउन सक्नेछन् भन्दै यसपाली विधवा भत्ता पाउनेहरूले पनि लक्ष्मी भण्डार योजनाको लागि आवेदन गर्न सक्ने बताइएको छ। यसको साथै पाडाये समाधान मार्फत शिविरमा मानिसहरूले आ-आफ्नो मुलभूत समस्या समाधानको निम्ति पनि आवेदन गर्न सक्ने महकुमा शासक सुदीप्त देवनाथले बताएका छन्।