मिरिकमा थर्बु चियाकमानमा दसैंको बोनस वितरण

मिरिक (निसं): मिरिकको थर्बु चिया कमानका चिया श्रमिकहरूलाई आज बुधबार यसपालीको दसैंको बोनस वितरण गरियो। बोनस पाएपछि श्रमिकहरू लगायत तिनका परिवारका सदस्यहरूमा खुशी देखा परेको छ। पहाडका चिया कमानहरूमा 19 प्रतिशतको दरमा बोनस वितरण गरिने सरकारी नोटिस जारी भएपछि आज गुडरिक कम्पनी अधिनस्थ मिरिकको थर्बु चिया कमानका चिया श्रमिकहरूलाई बोनस वितरण गरिएको चिया कमानका बडाबाबु मनोज खड्काले जानकारी गराएका छन्। तिनले चिया श्रमिकहरूको ब्याङ्क खातामा सोझै बोसन भुक्तान गरिएको जानकारी गराउँदै एकजना चिया श्रमिकले धेरैमा 18 हजार रूपियाँसम्म बोनस पाएको बताएका छन्। दशैको मुखैमा रहेकोले आज बोनसको पैसा ब्याङ्क खातामा पसेपछि थर्बु चियाकमानका चिया श्रमिकहरूले राहतको अनुभाव गरेको यहाँका श्रमिकहरूको भनाई रहेको छ।