मुख्यमन्त्रीको पहाड आगमनले टीएमसी कार्यकर्ताहरूमा थप ऊर्जा प्राप्त भएको छ : एलबी राईले

मिरिक: पश्चिम बंगाल राज्यकी मुख्यमन्त्री ममता ब्यानर्जीको पहाड भ्रमणले तृणमूल कङ्ग्रेसका कार्यकर्ताहरूमा थप ऊर्जा भरिदिएको हिल्स तृणमूल कङ्ग्रेस चेयरम्यान एलबी राईले बताए। तिनले मिरिकमा पत्रकारहरूलाई सम्बोधन गर्दै मुख्यमन्त्रीले हालै खरसाङमा गरेको प्रशासनिक बैठकमा पहाडको सर्वाङ्गिन विकासमाथि चर्चा भएको जानकारी गराउँदै हिल्स तृणमूल कङ्ग्रेस टोलीले राज्यका विभिन्न मन्त्रीहरूसित भेटेर राजनैतिक गतिविधि साथै साङ्गठनिक क्रियाकलापबारे पनि चर्चा गरेको बताए। मुख्यमन्त्रीले आफुहरूलाई पहाडका सबैसित मिलेर कार्य गर्नु भनेकोले गर्दा सोही अनुरूप कार्य गर्नेछौ भन्दै अब पार्टीगत क्रियाकलापलाई अझ सक्रिय अघि बढाएर लैजाने तिनले बताए। तिहारपछि आफुहरू कलकत्ता जाने अनि त्यहाँ नै पहाडको विकास साथै साङ्गठनिक गतिविधिबारे चर्चा गर्ने तिनले बताए। तिनले मुख्यमन्त्रीको पहाड आगमनले पहाड आउने दिनमा विकासको पथमा अझ अघि बढ्ने बताए।