मुम्बई म्याराथानमा चौबन्दी र फरिया लगाएर दौडिन् दार्जिलिङकी सोनिया

दार्जिलिङ : टाटा मुम्बई म्याराथान दौड प्रतियोगितामा दार्जिलिङकी सोनिया राईले चौबन्दी र फरिया लगाएर दौडिन्। यसको साथै तिनले सबैको ध्यान आफूमाथि आकर्षित गराउनको साथै उक्त दौडमा 10औँ स्थानमा जीत हासिल गर्न तिनी सफल भइन्। धावकको परम्परालाई पर सारेर दौड जित्नको लागि होइन तर भारतीय गोर्खा र दार्जिलिङ पहाडको गर्व र परिचय देखाउन आफूले मुम्बई म्याराथानमा 42 किलोमिटरको दौडमा अंश ग्रहण गरेको हो भन्दै तिनले उक्त दौड 4 घण्टा 16 मिनट 42 सेकेन्डमा पुरा गरेर दशौँ स्थान ओगट्न सफल भइन्। जीतपछि तिनले भनिन्, अन्तर्राष्ट्रिय स्तरको म्याराथानमा दौड जित्नभन्दा बढी हामी गोर्खाको गौरव र परिचय देखाउन थियो यसैले गर्दा चौबन्दी र फरिया लगाएर दौडिने निर्णय गरेको थिए जसमा म पनि सफल भएको छु। चौबन्दी र फरिया लगाएर दौड्नु केही असहज कुरो भए तापनि यसलाई आफूले असहजता नमानेको दार्जिलिङ रामपुरे बस्ती निवासी 26 वर्षीय सोनिया राईले बताइन्। उक्त टाटा मुम्बई म्याराथान प्रतियोगितामा 42 किलोमिटरको दौड रहेको जसमा 9 हजार 6 सय 22 जना धावकले भाग लिएका थिए। सोनियाबाहेक दार्जिलिङका अन्य चार धावक छिरीङ ल्महु भुटिया, विक्रम राई, जतीन छेत्री र रितेश राईले पनि यस म्याराथान दौडमा अंश ग्रहण गरेका थिए।