नदीले बगाएको वृद्धको शव एकदिन पछि उद्धार

अलिपुरद्वार : अलिपुरद्वार जिल्लाको कुमारग्राम ब्लकको चेङमारी ग्राम पञ्चायत अन्तर्गत बालापाडा इलाकाको नदीबाट वृद्धको शव उद्धार भएको छ। मृतक वृद्धको नाम जाखलु खरिया (75) बताइएको छ। आपदा प्रबन्धन विभागका कर्मचारीहरूले आज बालापाडा इलाकाको संकोश नदीको शाखा नदी घोलानीबाट वृद्धको शव उद्धार गरेको हो। स्मरण रहोस्, गत बुधबार कुमारग्रामको मध्य हल्दीबारीको बित्तीबारी इलाकाको संकोश नदीमा नुहाउन गएका खरियापाडाका वृद्धलाई नदीले बगाएपछि तिनी निखोज भएका थिए। यसपछि नदीमा धेरै समयसम्म तिनको खोजी गरे तापनि कुनै पत्तो नलागेपछि आज बिहानैदेखि नदीमा स्पिड बोर्डको सहयोगमा उक्त वृद्धको खोजी शुरू गरेको थियो। आज अपरान्ह बालापाडा इलाकाको नदीबाट तिनको शव उद्धार भएको बताइएको छ। घटनाको खबर पाएर कुमारग्राम थाना पुलिस घटनास्थलमा पुगेर वृद्धको शव उद्धार गरेपछि पोस्टमार्टमको लागि पठाएको छ।