नक्सलबारी: नक्सलबारीको टुकुरियाझार जंगलमा काठ चोर्दै गर्दा वन कर्मीहरूसित भएको झडपमा एकजना तस्करको गोली लागेर मृत्यु भएको छ। प्राप्त जानकारी अनुसार गत राति नक्सलबारीको टुकुरियाझार जंगलमा एउटा समुह काठ चोरी गर्ने उद्देश्यले आएको थियो। उक्त जानकारी पाएर वन कर्मीहरू घटनास्थलमा जाँदा काठ तस्करहरूसित झडप भयो। उक्त घटनापछि एकजना काठ तस्करको गोली लागेको शव घटनास्थलबाट वन कर्मीहरूले उद्धार गरेको छ। यसपछि खरसाङ वन विभागका अधिकारीहरू अनि दार्जिलिङ जिल्लाको ग्रामीण डीएसपी, सर्कल इन्सपेक्टर लगायत नक्सलबारी, खोरीबारी थानाको विशाल पुलिस वाहिनीको टोली, एबी वन विभागको टोली घटनास्थलमा पुग्यो। पुलिसले उद्धार गरिएको शवलाई नक्सलबारी अस्पतालको मुर्दा घरमा पठाइदिएको छ। पुलिसले घटना स्थलबाट काटेको रूख सहित धारिलो हतियारहरू पनि उद्धार गरेको छ।