फाँसीदेवा : फाँसीदेवा ब्लकको जालास निजामतारा अञ्चलको बनिकजोत गाउँमा एकपछि अर्को गर्दै 3 वटा मन्दिरमा चोरी भएको छ। प्राप्त जानकारी अनुसार आज बिहानै बनिकजोत गाउँको एउटा घरमा रहेको मन्दिरमा चोरी भएको बताइएको छ। आज बिहान उक्त घरका सदस्यहरू उठ्दा मन्दिरको दैलो खुल्ला देखेपछि भित्र पसेर हेर्दा मन्दिरमा राखेको पित्तलको घण्टी, मूर्तिमा लगाइएको सुन-चाँदीको गहना लगायत पुजाको सामग्रीहरू चोरी भएको थाहा पाए। यसको साथै इलाकाको अझै 2 वटा मन्दिर चोरी भएको बताइएको छ। इलाकावासीहरूको भनाइ अनुसार यस प्रकारको चोरीको घटना इलाकामा कहिले भएको थिएन। एकपछि अर्को गर्दै 3 वटा मन्दिरमा चोरीको घटना घटेकोले इलाकावासी चिन्तित छन्। चाँडै आरोपीहरूलाई पक्राउ गरेर सजाय दिइनुपर्ने तिनीहरूले माग गरे। घटनाको खबर पाएर फाँसीदेवा थाना पुलिस घटनास्थलम पुगेर छानबीन गर्नको साथै घटनाको जाँच शुरू गरेको पुलिस सूत्रले जनाएको छ।