राजगञ्ज : फाटापुकुरदेखि राजगञ्ज यातायात गर्ने एकमात्र सडक हाल बेहाल अवस्थामा रहेको छ। उक्त सडकको केही भाग एक ठाउँमा भत्किएको छ। प्राप्त जानकारी अनुसार राजगञ्जको तोताईगछ बीडीओ कार्यालयको ठिकअघि सिँचाई नहरको कल्भर्ट संलग्न सडकको केही अंश भत्किएको छ। कल्भर्ट मुनिको माटो धस्किएकोले गर्दा अलिकति खाली ठाउँ बाहिर आएको छ। यस्तो अवस्थामा उक्त सडक भएर ठुल्ठुला वाहनहरू चलाचल गरिरहेकोले गर्दा कुनै पनि समय ठुलो दुर्घटना हुनसक्ने इलाकावासीहरूले आशंका गरेका छन्। स्थानीय मानिसहरूले बताए अनुसार लगभग 3 महिनादेखि उक्त सडक बेहाल अवस्थामा रहेको छ। बिस्तारै बिस्तारै माटोको कटाव बढ्दै गइरहेको छ। यसबारे स्थानीय प्रशासनलाई अवगत गराए तापनि कुनै पहल गरेको छैन। अर्कोतिर, स्थानीय पञ्चायत सदस्य स्वर्णजीत रायले भने, यसबारे उच्च अधिकारीहरूलाई जानकारी गराइसकेको छ। चाँडै नै समस्याको समाधान गरिने कुरामा आशावादी रहेको तिनले बताए।