पुलिस अधिकारीको स्वास्नीको चेन छिनताई गर्ने बदमाश पक्राउ

सिलगढी (निसं): पुलिस अधिकारीको स्वास्नीको सुनको चेन छिनताई गरेको 24 घण्टाको अवधिमै पुलिसले उक्त बदमाशलाई पक्राउ गरेपछि आज सिलगढी अदालतमा पेश गर्यो। प्राप्त जानकारी अनुसार हिजो बिहान सिलगढी मेट्रोपोलिटनको एकजना  पुलिस अधिकारीकी स्वास्नी हिन्दी हाई स्कुल नजिक मार्निङ वकको लागि गएको समय एकजना बदमाशले पछिल्तिरबाट तिनको घाँटीमा लगाएको सुनको चेन थुतेर चम्पट कसेको थियो। यसपछि घटनाबारे सिलगढी थानामा लिखित अभियोग दर्ता गरेपछि अभियोगको आधारमा जाँचमा जुटेका पुलिसको क्राइम विङ टीमले घटनाको 24 घण्टाको अवधिमै गत राति पीएनटी गल्लीबाट उक्त बदमाशलाई पक्राउ गरेको बताइएको छ। यसको साथै पुलिस अधिकारीको स्वास्नीको छिनताई गरेको डेढ तोला सुनको चेन पनि उद्धार गरेको छ। पुलिसले घटनाको जाँच शुरू गरेको छ।