पुलिस प्रशासनले गऱ्यो साहु नदीको छठ घाटको निरीक्षण

राजगञ्ज, १७ नोभेम्बरः आउँदो बिहीबार छठ पूजा रहेकोले आज मङ्गलबार साहु नदी छठ घाटको पुलिस प्रशासनले निरीक्षण गऱ्यो। प्राप्त जानकारी अनुसार, मङ्गलबार सिलगढी पुलिस कमिश्नरेटका एसीपी सोमनाथ दास, आमबारी थाना आउट पोस्टका ओसी हिरुकान्ति सरकार लगायत अन्य पुलिस अधिकारीहरूले राजगञ्ज ब्लकको बिन्नागढी ग्राम पञ्चायतको कृष्णनगर कलोनीस्थित साहु नदीको घाटको निरीक्षण गरे।
यस सम्बन्धी छठ पूजा समितिका सदस्य चन्दन विश्वासले भने, “आज आमबारी आउट पोस्ट थाना पुलिस कृष्णनगर कलोनीको छठ घाटको निरीक्षण गर्न आए। उनीहरूले पूजा तयारीबारे हेरचाह गरे साथै पूजा सम्बन्धी सरकारी नियम बारेमा जानकारी दिए। यहाँ लगभग गत 19 वर्षदेखि छठ पूजाको आयोजना हुँदै आइरहेको छ। प्रत्येक वर्ष झै यस वर्ष पनि हजारौँ श्रद्धालुहरू आउने आशा छ।”